Na Dustana Shekidele,Morogoro.
Huzuni imetawara baada ya Maafande wa Ruvu Shooting kupokea kichapo cha bao 1-0 dhidi ya wageni wao Kagera Sugar kwenye mchezo wa ligi kuu uliopigwa juzi uwanja wa Jamhuri Mkoani hapa.
Kichapo hicho kimeifanya timu hiyo ya Ruvu kutoka Mlandizi Mkoa wa Pwani kuendelea kuburuza mkia kwenye msimamo wa ligi hiyo inayoelekea ukingoni wakiwa na Pointi 17 huku Yanga inayoongoza ligi hiyo ikiwa na Pointi 65.
Baada ya Mwamuzi kumaliza mchezo huo baadhi ya wachezaji wa Ruvu walijiangusha chini kwa uchungu kwa kichapo hicho kinacho wasafishia njia ya kushuka daraja.
Kufuatia hali hiyo baadhi ya wachezaji wa Kagera Sugar waliacha kushangilia ushindi huo na kubeba jukumu la kuwafariji wacheaji hao wa Ruvu.
Hali kadharika Kocha msaidizi wa Kagera Sugar Juma Kaseja alitinga kwenye benchi la Ruvu na kumfariji kocha msaidi wa timu hiyo.
Miongoni mwa mikakati ya maafande hao wa Ruvu ilikuwa kushinda michezo yote ya nyumbani wakipigania kutoshuka daraja, hivyo kupoteza mchezo huo muhimu nyumbani ndio sababu ya wachezaji hao kujawa na machungu moyoni.
Baada ya mchezo huo Ruvu wanakwenda Mbeya kucheza mechi mbili ya kwanza watakipiga na Mbeya City huku gemu ya Pili wakikipiga na Tanzania Prisons timu zote hizo ziko kwenye janga la kushuka daraja.
Ruvu wakitoka Mbeya watareja nyumbani Morogoro kukipiga na ‘Wana ramba ramba’ Azam Fc inayopigania kushika nafasi tatu za juu.
Kwa mpangilio wa ratiba hiyo miujiza ya Mungu pekee ndio inayohitajika kuinasua timu ya Ruvu kujinasua na janga la kushuka daraja.
No comments:
Post a Comment